સાઉદી અરેબિયામાં શનિવારે (29 માર્ચ, 2025) ઈદનો ચાંદ દેખાયો છે. ત્યારે સાઉદીમાં ઈદનો તહેવાર 30 માર્ચે ઉજવવામાં આવશે. જ્યારે ભારતમાં ઈદ-ઉલ-ફિત્રનો તહેવાર સાઉદી અરેબિયાના એક દિવસ પછી એટલે કે પરમદિવસે (31 માર્ચ) ઉજવવામાં આવશે. ચાંદ દેખાયા બાદ સાઉદી અરેબિયાએ સત્તાવાર રીતે જાહેરાત કરી છે કે રવિવારે ઈદ-ઉલ-ફિત્ર ઉજવવામાં આવશે.
સાઉદી અરેબિયામાં રમઝાન ભારત કરતાં એક દિવસ વહેલો એટલે કે 1 માર્ચથી શરૂ થયો હતો. આ જ કારણ છે કે ભારતમાં ઈદનો તહેવાર સાઉદી અરેબિયાના એક દિવસ પછી 31 માર્ચે ઉજવવામાં આવશે. દર વખતે, સાઉદી અરેબિયામાં ઈદનો ચાંદ ભારતમાં એક દિવસ પહેલા દેખાય છે. જોકે, ઈદ ક્યારે ઉજવાશે તે સંપૂર્ણપણે ચાંદ જોવા પર આધાર રાખે છે.
