મોડાસા કેળવણી મંડળ સંચાલિત બી-કનઈ શાળાના ભૂતપૂર્વ વિદ્યાર્થી ખિલન પટેલે અંડર-19 ક્રિકેટ વર્લ્ડ કપ-2026 માં શાનદાર પ્રદર્શન કરી વિશ્વ વિજેતા બનવાનું બહુમાન મેળવ્યું છે. આ ઐતિહાસિક સિદ્ધિ બદલ આજે શાળા પરિવાર અને મોડાસા કેળવણી મંડળ દ્વારા તેમનું ભવ્ય વિજય સન્માન કરવામાં આવ્યું હતું.
ખિલન પટેલનું શાળાના મુખ્ય દ્વાર પર ઢોલ-નગારા અને પુષ્પવર્ષા સાથે ભવ્ય સ્વાગત કરવામાં આવ્યું હતું. વિદ્યાર્થીઓએ ‘ભારત માતા કી જય’ ના નારા લગાવી સમગ્ર વાતાવરણ ગજવી દીધું હતું.
મોડાસા કેળવણી મંડળના પ્રમુખ બિપીન. ર શાહ, ઉપપ્રમુખ પંકજ બુટાલા તેમજ નિખિલ શાહ અને અન્ય હોદ્દેદારો દ્વારા ખિલનને સ્મૃતિચિહ્ન અને પ્રમાણપત્ર આપીને સન્માનિત કરવામાં આવ્યો હતો. સંસ્થાના પ્રમુખે જણાવ્યું હતું કે, “ખિલને માત્ર શાળાનું જ નહીં પણ સમગ્ર અરવલ્લી જિલ્લા અને ગુજરાતનું નામ વૈશ્વિક સ્તરે રોશન કર્યું છે.”
પોતાની સફળતાનો શ્રેય શાળાના ગુરુજનો અને માતા-પિતાને આપતા ખિલને જણાવ્યું કે, “આ જ મેદાન પર રમીને મેં ક્રિકેટના પાઠ શીખ્યા છે. સખત પરિશ્રમ અને આત્મવિશ્વાસ હોય તો નાના શહેરનો યુવાન પણ વિશ્વ જીતી શકે છે.”
આ પ્રસંગે શાળાના કેમ્પસ ડાયરેક્ટર જે. પી ઉપાધ્યાય તેમજ આચાર્ય કુંદન સિંહ જોદ્ધા , વાઇસ પ્રિન્સિપાલ વિક્કી ડી સોની , શિક્ષકગણ અને મોટી સંખ્યામાં વિદ્યાર્થીઓ ઉપસ્થિત રહ્યા હતા.
શાળાના ભૂતપૂર્વ વિદ્યાર્થીની આ સફળતાથી વર્તમાન વિદ્યાર્થીઓમાં પણ રમતગમત પ્રત્યે નવો ઉત્સાહ જોવા મળ્યો હતો. સમગ્ર મોડાસા પંથકમાં ખિલન પટેલની આ સિદ્ધિની ખુશીની લહેર પ્રસરી ગઈ છે.
