મોડાસા: અરવલ્લી જિલ્લાના મુખ્યમથક મોડાસા ખાતે આંતરરાષ્ટ્રીય મહિલા દિવસ નિમિત્તે મહિલાઓના સશક્તિકરણ, સ્વાસ્થ્ય અને ફિટનેસને પ્રોત્સાહન આપવા વિવિધ પ્રવૃત્તિઓનું આયોજન કરવામાં આવ્યું હતું. જિલ્લા કલેક્ટર પ્રશસ્તિ પારીકના અધ્યક્ષસ્થાને યોજાયેલા આ કાર્યક્રમોમાં મોટી સંખ્યામાં મહિલાઓએ ઉત્સાહપૂર્વક ભાગ લઈને મહિલા દિવસને યાદગાર બનાવ્યો હતો.
આ પ્રસંગે રવિવારે ‘Sundays on Cycling’ કાર્યક્રમના ભાગરૂપે ખાસ મહિલાઓ માટે સાયકલિંગનું આયોજન કરવામાં આવ્યું હતું. સાયકલિંગ બાદ મોટી સંખ્યામાં મહિલાઓ સાથે વૉકેથોન યોજાઈ હતી, જેમાં નાની બાળકીઓથી લઈને યુવાન તથા વડીલ મહિલાઓએ પણ ઉત્સાહભેર ભાગ લીધો હતો.વૉકેથોન પૂર્ણ થયા બાદ વિવિધ રમતો અને મનોરંજક પ્રવૃત્તિઓનું આયોજન કરવામાં આવ્યું હતું. મહિલાઓએ આ રમતોમાં ઉત્સાહ અને ઉર્જા સાથે સહભાગિતા દર્શાવી હતી. કાર્યક્રમનો મુખ્ય ઉદ્દેશ મહિલાઓમાં શારીરિક તંદુરસ્તી, સ્વાસ્થ્ય પ્રત્યે જાગૃતિ અને પરસ્પર એકતાની ભાવનાને મજબૂત બનાવવાનો હતો.
અરવલ્લી જિલ્લા કલેક્ટર પ્રશસ્તિ પારીકે જણાવ્યું હતું કે મહિલાઓનું સ્વાસ્થ્ય અને સશક્તિકરણ સમાજના સર્વાંગી વિકાસ માટે ખૂબ જ જરૂરી છે. સાયકલિંગ અને વૉકિંગ જેવી પ્રવૃત્તિઓ દ્વારા મહિલાઓમાં શારીરિક તેમજ માનસિક સ્વાસ્થ્યમાં વધારો થાય છે અને તેઓ વધુ આત્મવિશ્વાસ સાથે જીવનમાં આગળ વધી શકે છે. તેમણે વધુમાં જણાવ્યું હતું કે છેલ્લા એક વર્ષથી દર રવિવારે ‘Sundays on Cycling’ કાર્યક્રમ દ્વારા લોકોને સાયકલિંગ માટે પ્રોત્સાહિત કરવામાં આવી રહ્યા છે, જેમાં આજે મહિલા દિવસ નિમિત્તે ખાસ મહિલાઓને જોડવામાં આવી હતી.
આ કાર્યક્રમમાં નાની બાળકીઓ સહિત યુવાન અને વડીલ મહિલાઓ મોટી સંખ્યામાં હાજર રહી હતી. આયોજિત વિવિધ પ્રવૃત્તિઓ દ્વારા મહિલાઓમાં એકતા, ઉર્જા અને સકારાત્મકતાનો સંદેશ ફેલાયો હતો. જિલ્લા કલેક્ટરના નેતૃત્વમાં યોજાયેલા આવા કાર્યક્રમો અરવલ્લી જિલ્લામાં મહિલા સશક્તિકરણ અને સ્વસ્થ જીવનશૈલીને પ્રોત્સાહન આપી રહ્યા છે.
