11માં આંતરાષ્ટ્રીય યોગ દિવસની ઉજવણીના ભાગરૂપે, જિલ્લા યુવા અને સાંસ્કૃતિક પ્રવૃત્તિઓની કચેરી તથા જિલ્લા રમત-ગમત અધિકારીની કચેરી દ્વારા જામનગરના આઇકોનિક સ્થળ માજૂમ ડેમ ખાતે એક વિશેષ યોગ પ્રદર્શનનું આયોજન કરવામાં આવ્યું હતું. આ કાર્યક્રમનું ઉદ્ઘાટન આજે સવારે 6:30 વાગ્યે થયું, જેમાં મોટી સંખ્યામાં યોગ ઉત્સાહીઓ, યુવાનો, વિદ્યાર્થીઓ અને સ્થાનિક નાગરિકોએ ઉત્સાહપૂર્વક ભાગ લીધો.યોગ શારીરિક, માનસિક અને આધ્યાત્મિક સ્વાસ્થ્યની સાથે પર્યાવરણીય સંનાદિતાને પ્રોત્સાહન આપે છે. માજૂમ ડેમના મનોહર વાતાવરણમાં યોજાયેલા આ કાર્યક્રમમાં યોગ નિષ્ણાતો દ્વારા વિવિધ યોગ આસનો જેમ કે સૂર્ય નમસ્કાર, તાડાસન, વૃક્ષાસન, ભુજંગાસન અને પ્રાણાયામનું પ્રદર્શન અને માર્ગદર્શન આપવામાં આવ્યું.
જિલ્લા યુવા અને સાંસ્કૃતિક પ્રવૃત્તિઓની કચેરીના અધિકારીઓએ જણાવ્યું કે, આ કાર્યક્રમનો ઉદ્દેશ યોગના ફાયદાઓ વિશે જાગૃતિ ફેલાવવા અને લોકોને તેમના રોજિંદા જીવનમાં યોગને અપનાવવા માટે પ્રોત્સાહિત કરવાનો હતો. જિલ્લા રમત-ગમત અધિકારીએ ઉમેર્યું કે, યોગ માત્ર શારીરિક સ્વાસ્થ્ય જ નહીં, પરંતુ માનસિક શાંતિ અને એકાગ્રતા વધારવામાં પણ મદદરૂપ છે.