અરવલ્લી જીલ્લાની અગ્રણી સહકારી સંસ્થા ધી ખેતીવાડી ઉત્પન્ન સમિતિ મોડાસાની બોર્ડ ઓફ ડિરેક્ટરની ચૂંટણી પાંચ મહિના અગાઉ યોજાઈ હતી પરંતુ અગમ્ય કારણોસર ચેરમેન અને વાઇસ ચેરમેનની ચૂંટણી મુલતવી રાખવામાં આવી હતી આખરે પાંચ મહિના પછી 18 માર્ચને બુધવારે ચેરમેન અને વાઇસ ચેરમેન પદ માટે ચૂંટણી યોજાતા ડિરેક્ટરો બે જૂથમાં વહેંચાઈ ગયા હોવાની માહિતી પ્રાપ્ત થઇ રહી છે બંને જૂથ પાસે સરખા ડિરેક્ટર હોવાથી ડિરેક્ટરોને લોભ પ્રલોભાન આપવામાં આવી રહ્યા છે બીજી બાજુ ભાજપની મેન્ડેડ પ્રથા મુજબ પક્ષ દ્વારા મોડાસા માર્કેટયાર્ડના ચેરમેન અને વાઇસ ચેરમેન માટે સેન્સ પ્રક્રિયા હાથધરવામાં આવી છે મોડાસા તાલુકાના ભાજપના રાજકારણમાં ભારે ગરમાવો જોવા મળી રહ્યો હોવાની સાથે બળવો થવાના એંધાણ વર્તાઈ રહ્યા છે
મોડાસા માર્કેટયાર્ડના ચેરમેન અને વાઇસ ચેરમેનની ચૂંટણી બુધવારે યોજવાની છે ત્યારે ડિરેક્ટરોમાં ભારે દોડધામ મચી છે ચેરમેન અને વાઇસ ચેરમેન બનાવા માટે ભાજપ સમર્પિત ડિરેકટરો બે ગ્રુપમાં વહેંચાઈ ગયા છે અને પદ પ્રાપ્ત કરવા ગાંધીનગર કમલમ કાર્યાલયથી દિલ્હી સુધી છેડા અડાડી રહ્યા છે ડિરેક્ટરોને અંદર ખાને બંને જૂથ દ્વારા લાખ્ખો રૂપિયાના પ્રલોભન આપવામાં આવી રહ્યા હોવાની સાથે એક જૂથ મેન્ડેડ ન મળે તો સંખ્યાબળના આધારે બળવો કરવાના મૂડમાં હોવાની સૂત્રો પાસેથી માહિતી પ્રાપ્ત થઇ હતી
ભાજપ મોવળી મંડળે સોમવારે મોડાસા માર્કેટયાર્ડના ચેરમેન અને વાઇસ ચેરમેન માટે મુરતિયા પર મહોર લગાવવા સેન્સ પ્રક્રિયા લેવા માટે તૈયારીઓ આદરી છે ત્યારે સેન્સ પ્રક્રિયામાં આવનાર ભાજપના પદાધિકારીઓ પર દબાણ લાવવા અને ડિરેક્ટરોને બંને જૂથ દ્વારા તેમની તરફેણમાં રજુઆત કરવા એડીચોંટીનું જોર લગાવી દીધું છે ત્યારે આગામી 44 કલાકમાં ભાજપ શીર્ષ નેતૃત્વએ ચેરમેન અને વાઇસ ચેરમેન પદ માટે કોના પર વિશ્વાસ મુક્યો છે તે જોવું રસપ્રદ બની રહેશે હાલ તો મોડાસા તાલુકાના સહકારી માળખામાં ભારે ગરમાવો જોવા મળી રહ્યો છે
