મોડાસા ના ધુણાઈ રૉડ પર મેટલ ઉખડવા માંડી, કોઈ ધ્યાન નહીં, કૉન્ટ્રાક્ટર ને છાવરતી મોડાસા નગરપાલિકા
વોરંટી દરમિયાન સમારકામ થવું જોઈએ છતાં કાર્યવાહી નહીં થતી હોવાની ચર્ચા, કોન્ટ્રાક્ટરોને લાભ પહોંચાડાતા હોવાની રાવ
મોડાસા: મોડાસા શહેરમાં વિવિધ વિસ્તારોમાં છેલ્લા કેટલાક વર્ષોમાં બનાવવામાં આવેલા CC રોડની ગુણવત્તા સામે ફરી સવાલો ઊભા થયા છે. અનેક સ્થળોએ રોડની સપાટી પરથી મેટલ બહાર આવવા લાગ્યું છે અને રોડમાં ક્ષતિ દેખાવા લાગી હોવાથી સ્થાનિકોમાં નારાજગી જોવા મળી રહી છે.
સ્થાનિકોમાં એવી ચર્ચા છે કે રોડના કામમાં નબળી ગુણવત્તાની કામગીરી થવાના કારણે થોડા જ સમયમાં રસ્તાઓ બિસ્માર બનવા લાગે છે. સામાન્ય રીતે રોડના કામમાં નક્કી કરાયેલા વોરંટી સમયગાળા દરમિયાન જો કોઈ ખામી જણાય તો સંબંધિત કોન્ટ્રાક્ટર દ્વારા સમારકામ કરાવવું ફરજિયાત હોય છે. જોકે, આવી કામગીરી સમયસર થતી ન હોવાના આક્ષેપો થઈ રહ્યા છે. મોડાસા ના ધુણાઈ રૉડ ની સ્થિતિ પણ આવી જ બની છે. અહીં મેટલ ઉખડવા લાગી છે, ક્યાંક ગટરના ઢાંકણાં પણ તૂટી ગયા તો ક્યાંક… આવી સ્થિતિમાં બેદરકાર કૉન્ટ્રાક્ટર સામે કાર્યવાહી કેમ થતીં નથી તે સવાલ છે.
શહેરમાં એવી પણ ચર્ચા છે કે ખામીગ્રસ્ત રોડનું સમયસર સમારકામ કરાવવાને બદલે વર્ષો સુધી સ્થિતિ યથાવત રાખવામાં આવે છે અને ત્યારબાદ નવા રોડના કામોને મંજૂરી આપી ફરી ખર્ચ કરવામાં આવે છે. આ કારણે સરકારી નાણાંનો યોગ્ય ઉપયોગ થઈ રહ્યો છે કે નહીં તે અંગે પણ પ્રશ્નો ઉઠી રહ્યા છે.
સ્થાનિકોનું કહેવું છે કે માત્ર CC રોડ જ નહીં પરંતુ પેવર બ્લોકના કામોમાં પણ ગુણવત્તાને લઈને વારંવાર ફરિયાદો સામે આવતી રહે છે. છતાં જવાબદાર વિભાગ દ્વારા અસરકારક દેખરેખ અને સમયસર કાર્યવાહી થતી ન હોવાની ચર્ચાઓ જોર પકડી રહી છે.
શહેરના નાગરિકોએ ખામીગ્રસ્ત રોડનું તાત્કાલિક ટેકનિકલ નિરીક્ષણ કરાવી, જવાબદાર કોન્ટ્રાક્ટર સામે નિયમ મુજબ કાર્યવાહી કરવા તેમજ વોરંટીની શરતો મુજબ સમારકામ કરાવવાની માંગ ઉઠાવી છે. જોકે, આ મામલે સંબંધિત વિભાગનો સત્તાવાર પક્ષ જાણવા મળ્યો નથી.
