ટાઉન પોલીસે શંકાસ્પદ રોમિયોને ઝડપી પાડ્યો હતો, ત્યારબાદ છોડી મુકતા સવાલો
ટાઉન પોલીસમાં મોડી રાત્રે પહોંચેલા મીડિયાના મિત્રોને ફરજ પર હાજર મહિલા પોલીસ અને કર્મીએ યુવકને લોકઅપમાં મુક્યો હોવાનો જણાવ્યું હતું
અરવલ્લી જીલ્લા પોલીસવડા સંજય ખરાતે નવરાત્રી પર્વમાં રોમિયોગીરી અટકાવવા અને દીકરીઓ સુરક્ષિત રીતે ગરબા રમી શકે તે માટે અસામાજીક તત્ત્વોને ડામવા શી ટીમ સહીત તમામ જીલ્લાની એજન્સી કાર્યરત કરી ગરબા સ્થળો અને જીલ્લામાં સઘન સુરક્ષા વ્યવસ્થા ગોઠવી છે.
મોડાસા શહેરની સુપ્રસિદ્ધ નવરાત્રીના પ્રવેશદ્વાર પર ગત રાત્રીએ એક શંકાસ્પદ યુવક બેફામ બન્યો હતો અને રોમિયોગીરી કરતા લોકોએ પોલીસને સોંપતા પોલીસજીપમાં ટાઉન પોલીસ સ્ટેશનમાં લાવી લોકઅપમાં મુક્યા પછી યુવક સામે કોઈ પ્રકારનો ગુન્હો નોંધ્યા વગર છોડી મુકતા ટાઉન પોલીસકર્મીઓની કામગીરી અંગે અનેક સવાલ પેદા થયા છે ટાઉન પોલીસે બપોરે ત્રણ વાગ્યા સુધી આવો કોઈ ગુન્હો નોંધાયો ન હોવાનું જણાવ્યું હતું સમગ્ર ઘટના અંગે જીલ્લા પોલીસવડા તપાસ કરાવે તેવી લોકમાંગ પ્રબળ બની છે.
મોડાસા ટાઉન પોલીસે રમઝટ નવરાત્રીના પ્રવેશદ્વારથી એક રોમિયોને ઝડપી પાડી સરકારી જીપમાં પોલીસ સ્ટેશન લઇ આવ્યા પછી અગમ્ય કારણોસર કોઈ પણ પ્રકારનો ગુન્હો નોંધ્યા વગર છોડી મુકતા પોલીસતંત્રની કામગીરી શંકાના દાયરામાં આવી ગઈ છે પોલીસે યુવકને કેમ છોડી મુક્યો, ઝડપી પાડેલ શખ્સને સરકારી જીપમાં કેમ ટાઉન પોલીસ સ્ટેશનમાં લઇ આવી સહીત અનેક સવાલોના પગલે પોલીસ કઠગરામાં આવી ગઈ છે.
