હવામાન વિભાગે ગુજરાત સહિત અનેક વિસ્તારોમાં ભારેથી અતિભારે વરસાદનું એલર્ટ જાહેર કર્યું
અમદાવાદ: ગુજરાતમાં ચોમાસું હવે વધુ સક્રિય બનવાના સંકેત મળી રહ્યા છે. ભારતીય હવામાન વિભાગ (IMD)ના જણાવ્યા મુજબ આગામી 48 કલાક દરમિયાન દક્ષિણ-પશ્ચિમ ચોમાસું સમગ્ર ગુજરાતને આવરી લેશે અને અનેક વિસ્તારોમાં ભારેથી અતિભારે વરસાદની સંભાવના છે.
હવામાન વિભાગે ખાસ કરીને દરિયાકાંઠાના વિસ્તારોમાં ભારે વરસાદને લઈને એલર્ટ જાહેર કર્યું છે. સાથે જ સૌરાષ્ટ્ર અને કચ્છમાં આગામી ત્રણ દિવસ સુધી સારા વરસાદની શક્યતા વ્યક્ત કરવામાં આવી છે.
દરિયાકાંઠાના વિસ્તારોમાં ભારે પવન અને ઉગ્ર દરિયાઈ સ્થિતિ સર્જાવાની શક્યતાને ધ્યાનમાં રાખીને માછીમારોને દરિયો ન ખેડવાની સલાહ આપવામાં આવી છે. વરસાદની આગાહીના પગલે નીચાણવાળા વિસ્તારોમાં પાણી ભરાવાની શક્યતા હોવાથી સ્થાનિક વહીવટી તંત્રને પણ સાવચેત રહેવા સૂચના આપવામાં આવી છે.
