જન્માષ્ટમીના પવિત્ર પાવન તહેવાર નિમિત્તે ભિલોડામાં નારસોલી રોડ પર ભોલેનાથ પાર્ટી પ્લોટ સામે આવેલ તિરૂપતિ સોસાયટીમાં નાના ભૂલકાઓ દ્વારા સ્વયં આયોજિત મટકીફોડ અને સાંસ્કૃતિક ઉત્સવ ઉજવવામાં આવ્યો હતો.કાર્યક્રમની ખાસિયત એ રહી કે, કોઈ વડીલોના સીધા હસ્તક્ષેપ વિના બાળકોએ જાતે જ ભેગા મળીને સમગ્ર તૈયારીઓ પૂર્ણ કરી હતી.
બાળકોએ જાતે દોરી બાંધીને મટકી શણગારી, શ્રી કૃષ્ણ ભક્તિના ગીતો સાથે ઉત્સાહપૂર્વક મટકીફોડનો આનંદ માણ્યો હતો.સોસાયટીના રહીશો તેમજ વડીલોએ ઉપસ્થિત રહ્યાને બાળકોના આ ઉત્સાહ અને એકતાની ભાવનાને તાળીઓના ગડગડાટથી વધાવી પ્રોત્સાહિત કર્યા હતા.
કાર્યક્રમ પૂર્ણ થયા બાદ સૌ માટે ચોકલેટ, ફરાળી ચેવડો, માખણ-મિસરી અને કેળાનો પ્રસાદ વહેંચવામાં આવ્યો હતો.સમગ્ર સોસાયટી પરિસરમાં ‘નંદ ઘેર આનંદ ભયો, જય કનૈયા લાલ કી’ ના નારા સાથે ભક્તિમય અને ઉત્સાહભર્યો માહોલ સર્જાયો હતો.
