South Korea Floods: દક્ષિણ કોરિયામાં ભારે વરસાદના કારણે સર્જાયેલી ભૂસ્ખલન, પૂર અને અન્ય ઘટનાઓમાં ઓછામાં ઓછા 31 લોકોના મોત થયા છે અને 10 લોકો ગુમ છે. ગૃહ અને સુરક્ષા મંત્રાલયે એક રિપોર્ટમાં જણાવ્યું છે કે શુક્રવાર અને શનિવારે મધ્ય અને દક્ષિણપૂર્વીય વિસ્તારોમાં 31 લોકોના મોત થયા છે.
અહેવાલો અનુસાર, ભારે વરસાદને કારણે ચેઓંગજુમાં પૂરના કારણે બસ એક અંડરપાસમાં ડૂબી જતાં બસમાં ફસાયેલા પાંચ લોકોના મૃતદેહોને બહાર કાઢવામાં આવ્યા હતા. અધિકારીઓએ જણાવ્યું કે 7,500થી વધુ લોકોને સ્થળાંતર કરવામાં આવ્યા છે. મોટાભાગના મૃત્યુ ઉત્તર ગ્યોંગસાંગમાં થયા છે, જ્યાં ભૂસ્ખલન અને મકાન ધરાશાયી થવાથી 16 લોકોના મોત થયા છે. દક્ષિણ ચુંગચેઓંગ પ્રાંતમાં ચાર મૃત્યુ નોંધાયા છે. પરંતુ અધિકારીઓએ ચેતવણી આપી છે કે મૃતકોની સંખ્યા વધવાની આશંકા છે.
શનિવારે સવારે એક મંત્રાલયના અહેવાલમાં જણાવાયું હતું કે મુશળધાર વરસાદને કારણે ભૂસ્ખલનને કારણે અનેક મકાનો ધરાશાયી થયા છે. ભૂસ્ખલનની ઘટનામાં 7 લોકોના મોત થયા છે. મંત્રાલયના અધિકારીઓએ જણાવ્યું કે મુશળધાર વરસાદને કારણે મંગળવારથી 10 લોકો લાપતા છે.
જુલાઈ મહિનાથી ભારે વરસાદ થઈ રહ્યો છે. છેલ્લા કેટલાક દિવસોમાં વરસાદને કારણે લગભગ 5,570 લોકોએ તેમના ઘરો ખાલી કરવા પડ્યા હતા અને 25,470 ઘરો વીજળી વગરના છે, એમ મંત્રાલયના અહેવાલમાં જણાવાયું છે. અહેવાલોમાં જણાવાયું છે કે શનિવારની રાત સુધીમાં, 4,200 થી વધુ લોકો અસ્થાયી આશ્રયસ્થાનોમાં રહેતા હતા.
મંત્રાલયે જણાવ્યું હતું કે શનિવારે 20 ફ્લાઇટ્સ રદ કરવામાં આવી હતી અને દેશની નિયમિત ટ્રેન સેવા તેમજ કેટલીક બુલેટ ટ્રેનો સ્થગિત કરવામાં આવી હતી. અહેવાલો અનુસાર લગભગ 200 રસ્તાઓ બંધ છે.
આજે એટલે કે રવિવાર સુધી કેટલાક ભાગોમાં વરસાદ ચાલુ રહેવાની સંભાવના
દક્ષિણ કોરિયાની હવામાન એજન્સીએ જણાવ્યું કે દેશના કેટલાક ભાગોમાં રવિવાર સુધી ભારે વરસાદ ચાલુ રહેશે. રાષ્ટ્રપતિ યુન સુક યેઓલના કાર્યાલયના જણાવ્યા અનુસાર, રાષ્ટ્રપતિએ વડા પ્રધાન હાન ડક-સૂને આપત્તિનો સામનો કરવા માટે તમામ ઉપલબ્ધ સંસાધનોને એકત્ર કરવા જણાવ્યું છે.
અહેવાલો અનુસાર, દક્ષિણ કોરિયાના મધ્ય પ્રદેશોમાં 9 જુલાઈ પછી સૌથી વધુ વરસાદ પડ્યો છે, જેમાં ગોંગજુ શહેર અને ચેઓંગયાંગ કાઉન્ટીમાં 600 મિલીમીટર (24 ઈંચ) થી વધુ વરસાદ પડ્યો છે.
