મોજશોખમાં દેવું થઈ જતા કપાતર પુત્રએ ઘરમાં ધાડ પાડી
અરવલ્લીના મોડાસા શહેરમાં માતા પિતા માટે લાલબત્તી સમાન કિસ્સો બન્યો છે શહેરની આઇટીઆઈ સામે આવેલી શ્યામનગર સોસાયટીમાં રહેતા એક યુવકે તેના માતા પિતા બહાર ગામ જતા ઘરમાં રહેલી તિજોરીમાંથી સોનાનો દોરો ચોરી વેચી નાખી અજાણ્યા ચોરે ચોરી કરી હોવાનું દ્રશ્ય ઊભું કરવા તિજોરીનો નકુચો તોડી નાખી માલસામાન રફેદફે કરી દીધો હતો જોકે પોલીસ તપાસમાં દૂધનું દૂધ અને પાણીનું પાણી થઈ જતા ચોરીની ફરિયાદના પગલે ચોર પુત્રને દબોચી લઈ જેલના સળિયા પાછળ ધકેલી દીધો હતો
મોડાસાના માલપુર રોડ પર આવેલ શ્યામનગર સોસાયટીમાં રહેતા દિનેશભાઈ અંબાલાલ કડિયાએ મોડાસા ટાઉન પોલીસ સ્ટેશનમાં તેમના ઘરમાં રહેલી તિજોરીમાંથી સોનાના દોરાની ચોરી થયાની ફરિયાદ નોંધાવતા ટાઉન પોલીસે સ્થળ તપાસ કરી આજુબાજુમાં લગાવેલ સીસીટીવી કેમેરા ચેક કરતા કોઈ સુરાગ પોલીસને હાથ ન લાગતા તેમના પુત્ર જીગરની હરકત શંકાસ્પદ જણાતા પોલીસે યુક્તિ પૂર્વક પૂછપરછ કરતા પહેલા ગલ્લા તલ્લા કર્યા પછી તેને દેવું થઈ જતા અને ઉછીના લીધેલ પૈસા લોકો ઉઘરાણી કરતા હોવાથી તેના માતા પિતા બહાર જતા તિજોરીમાં રહેલ 1.30 લાખનો દસ ગ્રામ સોનાનો દોરો ચોરી કરી વેચી કાઢ્યો હોવાની કબૂલાત કરતા પોલીસ અને યુવકના માતા પિતા પણ ચોંકી ઉઠ્યા હતા
મોડાસા ટાઉન પોલીસે જીગર કડિયાએ વેચી કાઢેલ સોનાનો દોરો રિકવર કરી પિતાની ફરિયાદના આધારે પુત્રને જેલના સળિયા પાછળ ધકેલી દઈ કાયદેસરની કાર્યવાહી હાથધરી હતી
