દિવાળીના પર્વને લઇને રાજસ્થાનથી ગુજરાતમાં દારૂ ઘૂસાડવામાં આવતા હોય છે ત્યારે રાજસ્થાન-ગુજરાત આંતરરાજ્ય સીમા પર પોલિસનો ચાંપતો બંદોબસ્ત ગોઠવવામાં આવ્યો છે. છેલ્લા એક સપ્તાહમાં લાખો રૂપિયાનો વિદેશી દારૂ પોલિસે પકડી પાડ્યો હતો ત્યારે અરવલ્લી જિલ્લાની રતનપુર આંતરરાજ્ય સીમા પર પોલિસ નજર રાખી રહી છે અને આવતા-જતાં વાહનોનું પણ ચેકિંગ કરવામાં આવી રહ્યું છે.
તહેવારો અને ચૂંટણીઓને લઇને વિદેશી દારૂ ગુજરાતમાં ઘૂસાડવાના બુટલેગરોના મનસુબા પર અરવલ્લી જિલ્લા પોલિસ પાણી ફેરવી રહી છે. જિલ્લા પોલિસ વડા સંજય ખરાતના માર્ગદર્શન હેઠળ રતનપુર શામળાજી સીમા પર પોલિસનો બંદોબસ્ત ગોઠવવામાં આવ્યો છે. રાજસ્થાન તરફથી આવતા વાહનોનું સઘન ચેકિંગ કરવામાં આવી રહ્યું છે. બુટલેગરો સક્રિય થતાં અરવલ્લી જિલ્લા પોલિસ પણ સતર્ક બની છે.
અરવલ્લી જિલ્લા પોલિસે છેલ્લા વીસ દિવસમાં 66 લાખ રૂપિયાનો વિદેશી દારૂ શામળાજી બોર્ડર પરથી પકડી પાડ્યો છે. આ સાથે જ ઓક્ટોબર મહિનામાં પોલિસે 1.39 કરોડ રૂપિયાનો પ્રોહિબિશન મુદ્દામાલ જપ્ત કરીને 27 આરોપીઓ વિરૂદ્ધ ગુનો નોંધી કાયદેસરની કાર્યવાહી હાથ ધરી છે.
