હાલ અરવલ્લી જિલ્લામાં શિક્ષણ વ્યવસ્થાને ગ્રહણ લાગ્યું હોય તેવું લાગી રહ્યું છે એક બાદ એક શાળાઓની વિવિધ ઘટનાઓ સામે આવી રહી છે. શાળાઓમાં ફી ઉઘરાવવી, બાળકોને માર મારવો અને હવે માર્કશીટમાં ભૂલો કરવી. ભિલોડા તાલુકાની પ્રાથમિક શાળામાં પરિણામમાં છબરડો સામે આવ્યો છે, જેમાં કુલ ગુણ કરતા શિક્ષકે મેળવેલ ગુણ વધારે આપી દીતે શિક્ષણ વ્યવસ્થાની કામગીરી પર સવાલો ઉઠી રહ્યા છે. લાખો રૂપિયાનો પગાર શિક્ષકોને મળતો હોય છે અને આવી બેદરકારી અને છબરડાઓ સામે આવે તે કેટલા અંશે વ્યાજબી તે એક સવાલ છે.
વાત એમ છે કે, હાલ એક સોશિયલ મીડિયા પર પરિણામ વાઈરલ થયું છે, જેમાં ભિલોડા તાલુકાની જાબચિતરીયાની પ્રાથમિક શાળાનું પરિણામ જોવા મળે છે, જેમાં મોટો છબરડો સામે આવ્યો. આ છબરડામાં ગુજરાતી વિષયમાં કુલ ગુણ 160 માંથી વિદ્યાર્થિનીને 173 માર્ક્સ આપી દેવાયા છે અને વિજ્ઞાન વિષયમાં પણ 160 ગુણમાંથી 171 માર્ક્સ આપીને શાળાઓ પોતાની પીઠ થપથપાવી છે. આ પ્રકારની કામગીરીથી લોકોમાં પણ રોષ જોવા મળી રહ્યો છે. આટલું નાનુ કામ અને તેમાં પણ છબરડો તે કેટલા અંશે વ્યાજબી છે તે એક સવાલ છે.
પ્રિન્ટ મિસ્ટેક હોય તો આચાર્યએ સહી કરતા પણ ખ્યાલ ન આવ્યો કે શું..?
પરિણામમાં હાલ છબરડો સામે આવ્યો છે, જેમાં બચાવવામાં એવું પણ જણાવવામાં આવ્યું હોવાની માહિતી પ્રાપ્ત થઇ છે કે, આ તો પ્રિન્ટ મિસ્ટેક છે, ચાલો માની લઈએ કે, પ્રિન્ટ મિસ્ટેક છે, પણ વર્ગ શિક્ષકે તેની તપાસણી કેમ ન કરી, ચલો વર્ગ શિક્ષકે તપાસી લીધું તો પણ આચાર્યએ આંખો બંધ કરીને સહી સિક્કા ઠોકી દીધા છે. અને આવી શાળાઓ પોતાની ભૂલો બચાવવા લૂલો બચાવ કરી રહી છે તે કેટલે અંશે યોગ્ય છે ?