પટેલના મુવાડા સરપંચે સદસ્યો અને આગેવાનોની સમજાવટ બાદ રાજીનામાનો પત્ર પરત લેતાં વિરોધીઓના હાથ હેઠા પડ્યા
અરવલ્લી જીલ્લાના બાયડ તાલુકાના પટેલના મુવાડા ગ્રામ પંચાયતના સરપંચ મુળજીભાઇ મકવાણાએ ચુંટાયાના છ મહિનામાં જ એકાએક રાજીનામું ધરી દેતાં પટેલના મુવાડા ગ્રામ પંચાયત વિસ્તાર સહિત સમગ્ર પંથકમાં ખળભળાટ મચી ગયો હતો.
લોકોમાં એક ચર્ચાએ જોર પકડયું હતું કે, આખરે એવું તો શું બન્યું કે મિલનસાર સ્વભાવના મુળજીભાઇએ સરપંચ પદ પરથી રાજીનામું આપવું પડ્યું. ??!
રાજકીય આંટીઘૂંટીથી ટેવાયેલા ના હોવાથી સરળ સ્વભાવના મુળજીભાઇ મકવાણાએ વિઘ્ન સંતોષી પરીબળોની અરજીઓથી હતાશ થઈને રાજીનામું આપ્યાની લોકચર્ચા હતી.
પટેલના મુવાડા ગ્રામ પંચાયતના સરપંચે રાજીનામું આપ્યાના સમાચાર જાણતાં હતપ્રભ થયેલા ગ્રામ પંચાયતના ચૂંટાયેલા સદસ્યો અને ગ્રામ પંચાયત વિસ્તારના આગેવાનોની સમજાવટ બાદ અંતે પટેલના મુવાડા ગ્રામ પંચાયતના સરપંચ મુળજીભાઇ મકવાણાએ તાલુકા વિકાસ અધિકારી બાયડને મળી આજરોજ તેમના રાજીનામાનો પત્ર પરત ખેંચતાં આખરે ઘી ના ઠામમાં ઘી પડી જતાં ગ્રામવાસીઓએ હાશકારો અનુભવ્યો હતો.