અરવલ્લી પોલીસના ડોગ સ્ક્વોડ વિભાગના ડોગ ક્રુઝનું ટૂંકી બીમારી પછી અવસાન થતા શોકની લાગણી છવાઈ હતી 7 વર્ષથી જીલ્લા પોલીસતંત્રનો ગુન્હાના ભેદ ઉકેલવામાં સારથી તરીકે ફરજ બજાવતો હતો
ક્રુઝ નામના ડોગે અત્યાર સુધીમાં જીલ્લામાં બનેલ ચોરી, લૂંટ સહિતના અનેક ગુનાઓમાં સરાહનીય કામગીરી કરી હતી. જેને લઈને પોલીસ ક્રુઝ નામના ડોગની કામગીરી ક્યારેક ભૂલી શકશે નહિ. પોલીસ જવાનોએ ક્રુઝના મૃતદેહને ગાર્ડ ઓફ ઓનર આપી અંતિમ વિધિ કરી હતી.
અરવલ્લી પોલીસ વિભાગના ડોગ સ્ક્વોડમાં ક્રુઝ નામના ડોગનું અવસાન થતાં પોલીસ કર્મીઓમાં શોકની લાગણી જોવા મળી રહી છે લેબ્રાડોર પ્રજાતિનો મેલ ડોગ જીલ્લા પોલીસતંત્રને 7 વર્ષ અગાઉ ભેટમાં મળતા ક્રુઝ નામ આપી એક વર્ષની સઘન તાલીમ પછી જીલ્લા ડોગ સ્ક્વોડમાં સમાવવામાં આવ્યું હતું, ત્યારથી અરવલ્લી પોલીસ સામે આવેલ અનેક નાના મોટા ગુનાઓને શોધવામાં પોલીસે ક્રુઝ ડોગની મદદ લીધી હતી.અને શામળાજી,મોડાસા ટાઉન અને બાયડ પોલીસ સ્ટેશનમાં નોંધાયેલ ત્રણ ગંભીર ગુન્હામાં ક્રુઝ ડોગના માર્ગદર્શનથી આરોપી સુધી પોલીસ પહોંચવામાં સફળ રહી ગુન્હાનો ભેદ ઉકેલી નાખ્યો હતો
જેની સરાહનીય કામગીરીને લઈને પોલીસ જવાનો દ્વારા ક્રુઝના મૃતદેહને જેમ એક પોલીસ જવાન ફરજ દરમિયાન મૃત્યુ પામે ત્યારે ગાર્ડ ઓફ ઓનર આપવામાં આવે છે તેવી રીતે ક્રુઝ નામના ડોગને પણ ગાર્ડ ઓફ ઓનરનું સન્માન આપીને તેના દેહનો અગ્નિ સંસ્કાર કરવામાં આવ્યો હતો.
