મુંબઈ : ભારતીય હવામાન વિભાગ (IMD) એ મુંબઈના ઘણા ભાગોમાં ભારે વરસાદ વચ્ચે ઓરેન્જ એલર્ટ જાહેર કર્યું છે. સમગ્ર શહેરમાં ટ્રેન અને બસ સેવાને માઠી અસર થઈ છે. મ્યુનિસિપલ અધિકારીઓએ જણાવ્યું હતું કે, સિઝનના પ્રથમ ભારે વરસાદને કારણે ઘણા નીચાણવાળા વિસ્તારોમાં પાણી ભરાયા હતા.
કુર્લા, ચેમ્બુર, સાયન, દાદર અને અંધેરી સહિત મુંબઈના ઘણા ભાગોમાં ભારે વરસાદ પડ્યો હતો.
એક અધિકારીએ જણાવ્યું કે હવામાન વિભાગે યલો એલર્ટ પણ જારી કર્યું છે, જેમાં 1 અને 2 જુલાઈએ શહેરના કેટલાક સ્થળોએ ભારે વરસાદની આગાહી કરવામાં આવી છે.
હિંદમાતા, પરેલ, કાલાચોકી, હાજી અલી, ડોકયાર્ડ રોડ, ગાંધી માર્કેટ અને બાંદ્રા જેવા વિસ્તારોમાં ઘણા રસ્તાઓ પર પાણી ભરાવાને કારણે રોડ ટ્રાફિક કાં તો ધીમો પડી ગયો અથવા અટકી ગયો.
પાણીના ભારે પ્રવાહ અને પૂરના કારણે BMCએ અંધેરી મેટ્રોને પશ્ચિમી ઉપનગરોમાં ટ્રાફિક માટે બંધ કરી દીધી હતી.
ઘણી જગ્યાએ લોકો ઘૂંટણ સુધી પાણીમાં પસાર થતા જોવા મળ્યા હતા અને ઘણા વાહનચાલકો કલાકો સુધી જામમાં અટવાયા હતા.
સત્તાવાર માહિતી અનુસાર, ગુરુવારે 119.09 મીમી વરસાદ નોંધાયો હતો, ત્યારબાદ પશ્ચિમ ઉપનગરોમાં 78.69 મીમી અને પૂર્વ ઉપનગરોમાં 58.40 મીમી સવારે 8 વાગ્યાથી રાત્રે 8 વાગ્યા સુધી વરસાદ નોંધાયો હતો.
શહેરમાં અવિરત વરસાદ વચ્ચે કાલબાદેવી અને સાયન વિસ્તારમાં મકાન ધરાશાયી થવાની બે ઘટનાઓ બની હતી. સદભાગ્ય કોઈ જાનહાનિ થઈ ન હતી અને લોકોને અસરગ્રસ્ત માળખાંમાંથી સુરક્ષિત રીતે બહાર કાઢવામાં આવ્યા હતા, એમ અધિકારીઓએ જણાવ્યું હતું.