ચીનની આ કંપનીએ ભારતના કર્મચારીઓની કરી છટણી, આ છે તેનું કારણ

એસયુવીનું નિર્માણ કરતી ચીનની સૌથી મોટી ઉત્પાદક કંપની ગ્રેટ વોલ મોટર્સે ભારતમાં એક અબજ ડોલરના રોકાણ સાથે પ્રવેશ કરવાની યોજના બનાવી હતી. જો કે અઢી વર્ષથી એફડીઆઇ ક્લીયરન્સની પ્રતિક્ષા કર્યા બાદ હવે કંપનીએ આ યોજનાને પડતી મૂકી છે. આ સાથે જ કંપનીએ ભારતમાં કાર્યરત તેમના 11 કર્મચારીઓની પણ છટણી કરી છે. કંપનીએ આ કર્મચારીઓને ત્રણ મહિનાનું સેવરેન્સ પેકેજ આપ્યું છે. તે ઉપરાંત આ કર્મચારીઓને છ મહિનાનું વેરિએબલ પે પણ આપવામાં આવ્યું છે. આપને જણાવી દઇએ કે વર્ષ 2020માં ગ્રેટ વોલ મોટરે અમેરિકી કંપની જનરલ મોટર્સના તાલેગાંવ પ્લાન્ટને ખરીદવા માટે એક ટર્મ શીટ એગ્રીમેન્ટ કર્યું હતું. કંપનીએ 2020ના ઓટો એકસ્પોમાં પણ ભાગ લીધો હતો.

અનેક કંપનીએ યોજના માંડી વાળી

ગ્રેટ વોલ મોટરથી પહેલા ચીનની અનેક કંપનીઓ ભારતમાં પ્રવેશના પ્લાનને પણ માંડી વાળ્યો છે. Changan, Haima અને Chery જેવી કંપનીએ પણ ભારતીય માર્કેટમાં પ્રવેશની યોજના બનાવી હતી પરંતુ તેઓ આ યોજનાને આગળ ના ધપાવી શક્યા. આ વિશે ગ્રેટ વોલર મોટરને મોકલવામાં આવેલા ઇમેલનો કોઇ જવાબ મળ્યો નથી. કંપનીનું પ્રપોઝલ બે વર્ષથી પણ વધુ સમયથી અટક્યું હતું. આ જ કારણોસર અમેરિકી કંપનીને પોતાના પ્લાન્ટને વેચવા માટે બીજા રસ્તા શોધવા પડ્યા હતા. ગ્રેટ વોલ અંદાજે એક દાયકાથી ભારતીય માર્કેટમાં પ્રવેશ માટેની રણનીતિ બનાવી રહી હતી. કંપનીએ સૌથી પહેલા 2014-15માં પણ પ્રવેશ માટે પ્રયાસ કર્યો હતો અને પછી 2017માં પણ યોજના બનાવી હતી. અંતે 2020માં જીએમના તાલેગાંવ પ્લાન્ટને ખરીદવા માટે એક ટર્મ શીટ એગ્રીમેન્ટ પર હસ્તાક્ષર કર્યા હતા.

Haval SUV બનાવતી કંપનીએ ગત બે વર્ષ દરમિયાન ભારતમાં પ્રવેશ માટે પ્રયાસ કર્યો હતો. એસેમ્બિલંગ અને સમગ્ર રીતે કારની આયાતા માટે પણ પ્રયાસ કર્યો હતો. પરંતુ તેઓને સફળતા મળી ન હતી. આ દરમિયાન કંપનીએ થાઇલેન્ડ અને બ્રાઝિલમાં પોતાના કામકાજની શરૂઆત કરી છે. પરંતુ ભારતમાં તેની યોજના અટવાયેલી છે. આ દરમિયાન કંપનીએ ભારત માટે બનાવેલી કંપનીને અન્ય માર્કેટમાં ટ્રાન્સફર કરી છે.